يامصر بحق من خلق الكون وحشتيني
شعر : سامي القريني
يامصر بحق من خلق الكون وحشتيني
مهما نلف وتشوف العيون
يسيل الدمع من عيني
كل لحظه بعيد عنك
نفسي أعملك حاجات
تخليكي ماتنسيني
نفسي أعملك قمر مخصوص
يزيد نور ليلك
زي ما انتي منوره جبيني
لما باقول للدنيا أنا من مصر
اسمها بس يعززني ويحميني
كل شارع كل شاطئ
كل ركن فيكي فاكره
كأني عايش فيه دلوقتي
الذكري بس بتحييني
نفسي اشتريلك شمس
تشرق عليكي بدفا
يوصللي يدفيني
كل صباح أصحي
أغمض عيني من تاني
أفكر فيكي وفأهلك الطيبين
أرجع طفل من تاني ألاقيني
فحوش المدرسة بألعب
فوسط أصحابي في الجامعه
فشركتي شغّال
مبسوط وأنا طالع عيني
قاعد علي فريسكا
سان إستفانوا
بأكتب دواويني
فليالي مصريه
في جنينه الماريوت
ليلاتي تلاقيني
بأعمل شغلي
حواليا أصحابي وحبايبي
بأهرب العب مع أطفالي
فسيتي ستارز أعمل أعاجيب
أصطاد دباديب
أوزع علي أطفال مأعرفهاش
أصطاد لها لما تناديني
يطنططوا مالفرحه
قلبي يرقص علي أنغام
فرحه تعزف علي جبيني
بيطلع الطفل من جوايا
العب معاهم ومعايا
أأقل حاجه فيكي يا مصر
تسعدني وترضيني
أشوف نفسي
علي كوبري قصر النيل
بعد نص الليل
أنا وعبد الوهاب مطاوع
بنشرب شاي من كنكه
أكلها الزمن يمر علينا الناس
لحد الفجر ما يأذن يناديني
علي الكورنيش قصاد القلعه
فلايك بتترقص
وأنا ماسك الزمن علشان مايمرش
ولحظه السعاده تتجمد
وأشد مع الصيادين الشباك
والناس طاله من الشباك
يطلع السمك ألوان
الفرحه تعُم المكان
إسكندريه الأصل والعنوان
وأفوق يوماتي من حلمي
بموجه بحر تغطيني
وأنا متفتحه عيني
